सत्ता गठबन्धनको बैठक बस्दै, जसपाका मन्त्रीहरुलाई हटाउने तयारी

काठमाडौं(पालिका हब)। सत्ता गठबन्धनको बैठक आज बस्दै छ । प्रधानमन्त्री निवास बालुवाटारमा दिउँसो २ बजे बैठक बस्ने तयारी भएको हो। 

बैठकमा आगामी प्रतिनिधि सभा र प्रदेश सभा निर्वाचनमा मुलुकका विभिन्न क्षेत्रमा सत्ता गठबन्धनकै दलबाट परेको बागी उम्मेदवारीका विषयमा शीर्ष नेताहरूबीच छलफल हुन लागेको हो। पार्टीमा टिकट नपाएपछि असन्तुष्ट बनेका नेताहरुले स्वतन्त्र उम्मेदवारी दर्ता गरेका छन्। 

साथै बैठकमा जनता समाजवादी पार्टी (जसपा)का मन्त्रीहरुलाई हटाउने विषयमा पनि छलफल हुने बताइएको छ । जसपाले गठबन्धन छाडेर नेकपा एमालेसँग चुनावी तालमेल गरेपछि सरकारमा रहेका जसपाका चार जना मन्त्रीहरूलाई राजीनामा दिन आग्रह गर्ने वा बर्खास्त गर्ने तयारी भएको हो। 

प्रधानमन्त्री शेरबहादुर देउवा नेतृत्वको सरकारमा जसपाबाट संघीय मामिला तथा सामान्य प्रशासनमन्त्री राजेन्द्र श्रेष्ठ, भौतिक पूर्वाधारमन्त्री मोहम्मद इस्तियाक राई, वन तथा वातवरणमन्त्री प्रदीप यादव र कृषि तथा पशुपक्षीमन्त्री मृगेन्द्रकुमार सिंह रहेका छन्।